تاج ... أول مرة

تاج .... وتيجان الملوك كثير ... لكن تيجان العقول "مضمحلة00

المهم ... ارسل لي صاحب مطبات هذا التاج رغبة منه واملا في القرب والوداد والصحبة والملوخية
لكني ... اقول له من هذا المنبر الاعلامي
" لا ... لا نساوم ولا نفاوض على الكرامة ... ايها الناس اقبل ايديكم والتراب من تحت اقدامكم .... بس الله يخليكوا ... اقرأوا التدوينة دي

.......................................................

من هو:أحب شخص لقلبك فى الدنيا؟
لسه مكلمها من شوية ... وعامل جردل دموع عشانها ... أمي

انسان مستعد تضحي بحياتك –ركز فى كلمة حياتك- عشانه؟
بصوا .... احنا هنتفلسفوا في الاجابة شوية ،، انا اجزم انه بالنسبة لموضوع التضحية ده موضوع غير محسوم تماما عند الاخرين حتى لو ادعى من ادعى
الموضوع ده بيكون رهين الموقف واللحظة ... يعني مثلا انا ممكن اضحي عشان امي وابي او المدام - ده لو ربنا اذن واجوزنا - او الواد حلاوة ابني ..
وهكذا

اسم أول حب؟
اه .. خد عندك ... الواد عبدو بحبه اوي والواد خالد والولاد ( محمد واحمد وصهيب واسامة وهكش وسنوسي ومؤمن وطموح .....الخ )
برده في واد كده بيجي منه هيبقى اعلامنجي فظيع ... الواد اكرم العوضي لسه عارفه من كام يوم .. بحبه اوي
برده في كل العيال صحابي اللي عارفهم ... برده بحب ابن حجر العسقلاني اوي ... والباشمهندس محمد - اللي محدش فيكم يعرفه - وبحب الواد محمد اخويا
واسماء اختي الكبيرة ... وبحب اعمامي .. وعماتي وخلاني وخلاتي ... وبحب بابا وماما وعمو فؤاد المهندس .. وفطوطة وبموت - بجد - في توم اند جيري
يا نهار ابيض ... مخدتش بالي ان السؤال ليه نوايا خبيثة ... يللا العتب ع الفهم لا مواخذة

اسم آخر حب...حتى الان
بإذن واحد أحد السؤال ده تسألوه بعد سنتين ، تلاتة، عشرة ، عشرين سنة .... بس ربنا يستر ورفيقة العمر - اللي هي المدام يعني - ومتفهمش السؤال غلط
ده لو كان فيه مدام طبعا .... ربنا يستر

إنسان كرهته لدرجة الجنون
و تمنيت لو تمسك سكينة وتنقض عليه وتغرزها فى قلبه تقتله
وتقف تبص لجثته وتشفي غليل قلبك؟
واحد كده بيفكرني بابن شلولح ... قلبه كاسر لا منكسر ... عقله خاوي عاطفته مجخية كالكوز ... منكوت بالنكت السودا
شنبه بيفكرني بعمك توفيق الدقن اما كان طالع مع نور الشريف وفريد شوقي في فيلم بيعمل فيه دور فتوة وبلطجي والساعد اليمين لكبير الحتة
بتهيألي انت عرفته
ولو معرفتوش يبقى الحمد لله

ما هو :اسم أجمل كتاب كتبه بشر قرأته ومحتفظ به حتى الان
حادي الارواح الى بلاد الافراح ... لابن القيم .... مش هتقدر تقفل الكتاب الا لما تخلصه ... لو عايز تحجزلك قصر في الجنة لازم تقرأه

اسم كتاب-كتبه بشر برضه- انت متعلق بيه وبتقرأه كل فترة

الرحيق المختوم للمباركفوري .... لو عايز تحبه اقرأ سيرته

اهم جهاز منزلى انت متعلق بيه او بتستخدمه كتير ؟
نظرا لوضعي النفساوي والانسواني ... فغالبا مقضي وقتي على هذا اللاب ... لكن برده بحس ان في شئ عاطفي بيني وبين الغسالة

شىء تحس بالراحة النفسية عندما تنظر اليه؟؟
وجهي في المراية ... وقمر 14 ... ووجه ابي وامي

مكان تحس بالراحة عندما تدخله ؟
18 شارع المغفرة - المجاورة التامنة - الفردوس الاعلى - بجوار قصر خالد بن الوليد
بالنسبة للدنيا ... بيتي اللي فيه ابي وامي ... يا رب ادخله قريب يا رب

اجمل مدينة زرتها داخل مصر
بوجه عام .. واختصارا ... مظهر الجمال انقرض من كل المدن والقرى والنجوع المصرية

أجمل مكان طبيعي رأيته داخل مصر؟
بحر رأس البر

نوع هاتفك المحمول؟
نوكيا إن سبعين أبو كاميرتين - كاميرا من وشه وكاميرا من قفاه

المساحة التى تشغلها المواد الاسلامية على جهازك ؟
لأ ... بلاش عشان لو في عصافير ولا حاجة

نفس المساحة السالف ذكرها فى قلبك-الاجابة لنفسك عشان الرياء يا اخواننا
اللهم ارزقنا الاخلاص

مواصفات فتاة الأحلام بالنسبة لك ؟
هحور على نفسي واقول كل اللي يجيبه ربنا كويس ... وزي ما قلنا ... انا بحور على نفسي

صف ما يأتى :شعورك لما بتسمع كلمة مصر؟
مــ ... صــ ... ــ ر
صعب اوي ان شعوري يقدر يتسوعب الكلمة دي ....
عشان كده بحس بمصر لنا بسمع كلمة مصر


شعورك لما بتسمع كلام عن اليهود
احساس - والكلام ده بجد - بالقرف والغثيان


شعورك لما بتشوف ظابط شرطة ؟
بفتكر الآية
"ونريد ان نمن على الذين استضعفوا في الارض ونجعلهم ائمة ونجعلهم الوارثين ونمكن لهم في الأرض ونري فرعون وهامان وجنودهما ما كانوا يحذرون"



شعورك لما بتشوف الكناس العجوز فى الطريق ؟
وظيفة نمطية يجب ان يقوم بها شخص ما ... وبالمقابل يجب ان يبادله المجتمع الوظيفة النمطية الاخرى وهي الاحترام
برده بفتكر
سيدنا رسول الله وهو بيرعى الغنم
وسيدنا داود وهو يبنفخ في الكير - حداد
وسيدنا نوح وسيدنا عيسى - نجارين
وبتمنى لو يأخذ الكناس هذه النية - إماطة الاذى عن الطريق

لون البطانية اللى بتتغطى بيها فى الشتاء
ينفع لحاف؟؟

لون الجورب-الشراب- المفضل لديك
اكيد اكد ... نظرية 7-2-1 وهبقى اشرح النظرية دي بعدين وايه علاقتها بلون الجورب

لمن ترسل هذا التاج ؟؟
لحبيبي وروح قلبي .... بتاع وش اعلام