يوم لما صاحبي اتاخد

" أحسب الناس أن يتركوا أن يقولوا آمنا وهم لا يفتنون ، ولقد فتنا الذين من فليعلمن الله الذين صدقوا وليعلمن الكاذبين"

...

مساء الأحد / العشرون من يوليو الحالي / قرابة الساعة العاشرة قبل منتصف الليل
كنت قد أتممت بعضا من مهمات العمل والارتباطات الأخرى في الدقي ، اتصلت بعدها بمحمد لكي اخبره بتطورات ( الواد كان لسه مرجع رقمه من كام يوم ، معزول عن الدنيا يعني )
أحمد : .......
محمد : .......
أحمد : خلاص .. يبقى اتفقنا ان شاء الله .
محمد : صمت!
أحمد : صمت!
محمد : بقولك ايه ... انت مش كنت هتدخل سينما ؟
أحمد : آه .. بس الصراحة مش عارف .. الوقت اتأخر دلوقتي .. بس هشوف.
محمد : طيب بقولك .. تعالى ندخل احنا الاتنين دلوقتي مع بعض .
أحمد : هو ايه الأجنبي المعروض دلوقتي ؟
محمد : hancock , kongfu panda.
أحمد : خلاص .. يبقى hancock بإذن الله .
محمد : ماشي ( بيقول ماشي كتير اوي عالفكرة ) مستنيك ان شاء الله.
...
وصلت الى مدينة نصر في تمام الحادية عشرة ، ووقفت انتظره 20 دقيقة ، قمنا بعدها بالحجز في حفلة بعد منتصف الليل ، ثم توجهنا لتناول طعام العشاء ( في مطعم صيني - اي والله ) في اكثر اماكن القاهرة كوزموبليتانية .. في سيتي ستارز .. ولا حول ولا قوة الا بالله.
...
رغم الاعجاب الشديد بـالاخ ( ويل سميث ) .. لكنني اصابني بعضا من الاحباط .. او احساس ان الاخ ( ويل ) قرر أنه يقلش هذه المرة ، لا استطيع ان اتذكر سوى اول ( 45 دقيقة ) من الفيلم ، ففي الساعة الثانية والربع رن محمول
محمد ،،
محمد : ايوا يا رضوى ؟؟
رضوى : ...................
محمد : لا حول ولا قوة الا بالله
رضوى : .....................
محمد : لا حول ولا قوة الا بالله ، طيب خلاص يا رضوى .. يللا .. سلام عليكم
....
أنا : ايه يا محمد ؟؟
محمد : هشام توفيق ( ظابط أمن دولة - مدينة نصر ) قالب عليا الدنيا وعندي في البيت وعاوزني.
أنا : بجد ؟
محمد : آه
أنا : طيب وبعدين ؟؟
محمد : رضوى قالتلي بلاش تيجي البيت دلوقتي.
أنا : ربنا يستر ان شاء الله.
...
بعد ذلك .. لم استطع ان اتذكر ايا من احداث الفيلم ، فقط الكثير من مشاهد الطيران والتحليق والضرب وهدم المباني وملاحقات السيارات ..
...
بعد مرور خمس دقائق .. يرن محمول محمد ثانية
محمد : ايوا يا بابا ؟
عمو رفعت : ايوا يا محمد .. الرائد هشام توفيق هنا ومعاه بعض الاخوة .. وعايز يكلمك .
محمد : ماشي
الوائد هشام توفيق : ايوا يا محمد .. انت فين ؟
محمد : أنا في السينما .
هشام توفيق - مذهولا - : بجد ؟؟؟!! (( عمو هشام مش مصدق .. الصدمة كانت شديدة يا جدعان ))
محمد : آه والله
الوائد هشام توفيق - متجعلصا - : فيلم ايه ؟
محمد : فيلم hancock.
الوائد هشام توفيق : آآآه (( دخلته قبل كده يا عمو ؟ )) ، طيب تعالي .
محمد : مش هينفع .
هشام توفيق : ليه ؟
محمد : معايا ناس وانا في نص الفيلم دلوقتي.
الوائد هشام توفيق : يا عم تعالى بس وأنا هديك تمن التذكرة (( عمو عمو .. دي اموال الدولة يا عمو )).
محمد : بجد والله مش هينفع ... هجي لحضرتك بعد ما الفيلم يخلص .
الوائد هشام توفيق : لا يا محمد .. مش همشي الا ما تيجي .
محمد : يا فندم هجيلك والله اول ما الفيلم يخلص .
الوائد هشام توفيق : ممم .. ماشي يا محمد .
...
صمت يخيم على القاعة الا من صوت طيران الاخ ( ويل سميث ) وصوت مناقشات بيني انا ومحمد .
...
بعد ان انتهي الفيلم ، خرجنا للتمشي قليلا ، كان ( عمو رفعت ) قد استطاع ان يقنع ( الوائد ) هشام توفيق أن يؤجل زيارة محمد الى صباح اليوم التالي ، تناقشنا في الموضوع ، وكنت خلال هذه المناقشة احاول ان استوضح من محمد ( ايه اللي عملته في الفترة الاخيرة ، طيب هل شاركت في اضراب ولا تنظيم ولا اي حاجة اليومين اللي فاتوا دول ولا حاجة ؟؟ ).
وبعد ان تأكدت - ولله الحمد - ان محمد غير مسؤل عن ثقب الاوزون وحرب العراق واضراب عمال غزل المحلة واختفاء البنزين من المحطات وتصدير اسلحة نووية لحركة حماس،سمحت لنهر العواطف أن يأخذ مجراه .. تواصينا ، وتذاكرنا .. كنت اعلم انني لن اراه غدا ، فقد أخذوه الكثير من مقتنياته وكتبه وأوراقه وجهاز الكمبيوتر الخاص به ، وهكذا هو اسلوب زوار الفجر
قلت له : محمد لعله خير ،، قال لي : ان شاء الله خير.
ورحل مبتعدا .. وفي قلبه الكثير من الايمان والعزم والصمود والصبر ..

...

صباح اليوم التالي وفي تمام الساعة الحادية عشرة توجه محمد إلى مقر أمن الدولة في مدينة نصر لمقابلة الأخ هشام توفيق ، المقابلة التي استمرت لمدة اربع ساعات ، وفي تمام الساعة الرابعة تم اصدار قرار اعتقال محمد 15 يوما وترحيله الى سجن ( ليمان طرة ) ، وثناء الترحيل استطاع ان يحصل على هاتف محمول وقام بالاتصال بي
...
محمد : ايوا يا أحمد يا شلبي ..
أحمد - غير مصدق - : محمد ؟؟
محمد : آه.
أحمد - غير مصدق برده - : انت طلعت ولا ايه ؟
محمد : لا .. انا خدت قرار ترحيل لليمان طرة 15 يوما .. وان شاء الله اطلع بعدها .. ما تقلقش .. وخلي معاد سفرك زي ما هو.
أحمد : مين اللي اصدر قرار الاعتقال ؟؟
محمد : هما .
أحمد : ومين اللي قالك انك هتطلع بعد الـ 15 يوم ؟
محمد : انا عارف .. ما تقلقش بس .. ان شاء الله خير .
أحمد : خلي بالك من نفسك يا محمد .
محمد : ان شاء الله .. يللا .. سلام عليكم
.....
نكمل القصة في التدوينات القادمة :
- زوار الفجر .. وفلسفة الإجرام
- أونكل طارق .. شكرا جزيلا
- اول يوم عرض نيابة
- " يا صاحبي السجن "